SERAT

Diteteup, dibaca, dibulak-balik serat ti salira

Kacida jentre nyeredet kana jero hate

Kacida nyentug ratug matak kapincut

Nyacapkeun kasono muntangan pangharepan

Nandangan rasa nu salawasna moal sulaya ti salira

Kanyaah ti salira nyaliara jeroning dada

Kadeudeuh tisalira ngahaleuang dina manah micangcam kaheman miceun kamelang

Bagja nampi serat ti salira

Kacida endah atra karasa

Kacida endah basa serat ti salira nyaangan hate nu dipalire

Nenjo potret salira ngahudang kasono nu moal matak mikapoho

Hayang ngagupayan nu jadi jungjunan

Kacida jauh paanggang-anggang

Ngan saukur kasorang ku panglamunan

Ngan saukur nganjang dina impenan

Ngan saukur sosonoan dian implengan

Teu kabobodo ku panenjo

Teu kasamaran ku paningali

Salira nu utami kembang endah pangharepan

Salira nu utami kembang endah panglamunan