SERAT

Diteteup, dibaca, dibulak-balik serat ti salira

Kacida jentre nyeredet kana jero hate

Kacida nyentug ratug matak kapincut

Nyacapkeun kasono muntangan pangharepan

Nandangan rasa nu salawasna moal sulaya ti salira

KADEUDEUH

Salira kembang endah panglamunan

Mepende hate nu tas lila teu dipalire

Rasa bagja nu kasorang mabra lir bentang nu baranang

Reunceum taya hinggana

NYERELEK

Ketrak-ketrek sora jam, ngareret waktu nu nyerelek ilang detik ganti waktu

Hate tetep ngocoblak kanu dipikasono

Emutan kumalayang nganjangan salira nu nyongcolang dina implengan

NGECREK

Hujan ngecrek ngageureuyeuk, ngagalingging tiis estu karasa nyeleuceup

Siganing ngageuing ati, sangkan ngawawadian emutan kasalira

Salira bebene hate nu jumeneng dina emutan, maturan emutan nu keur ring-rang

KAYUNGYUN

Saban poe kuring teu genah cicing

Nganti-nganti nu piaati

Harita salira sumping

Linggih paamprok jonghok dirorompok

Nganjangkeun ati nu kabandang

MUNGGARAN

Haritaning kuring sumping munjungkeun ati nu kabandang

Nganti-nganti nu dipiati, ngaharewoskeun wartos kanu diantos

Ngaraketkeun tali mimitran nu tas liola sewing-sewangan, nagalayeutkeun ati, sauyunan manah

Babarengan ngaheuyeuk geugeut

Satuhu saestu na pangharepan nu keur dituju

Ngondang bagja keur engke jaga